Strategaeth oes
CYM | 
ENG
Y strategaeth sy’n cael ei ffafrio ar hyn o bryd ar gyfer dadgomisiynu safle Wylfa, fel holl orsafoedd pŵer niwclear Magnox y DU, yw gohirio’r gwaith o glirio’r safle, fel bod modd clirio’r safle cyfan tua 100 mlynedd ar ôl rhoi’r gorau i gynhyrchu. Mae’n lleihau’r risg i weithwyr, i’r cyhoedd ac i’r amgylchedd; yn lleihau maint y gwastraff; yn syml o safbwynt technegol ac yn gwneud synnwyr o safbwynt ariannol.
Mae Magnox Electric Ltd yn defnyddio’i wybodaeth a’i arbenigedd er mwyn cyflymu cynllun y gwaith dadgomisiynu, nad yw’n gwahardd gostyngiad yn y cyfnod o 100 mlynedd cyn clirio’r safle cyfan.
Bwriedir i Wylfa barhau i gynhyrchu trydan tan 2010, a bydd y gwaith gwagio tanwydd yn dechrau yn yr un flwyddyn. Dyma fydd cychwyn rhaglen dadgomisiynu’r orsaf bŵer.
Y cynllun dadgomisiynu yn Wylfa
2005-2010 Cynhyrchu Trydan
- Gweithredu’r orsaf bŵer mewn modd diogel sydd hefyd yn ystyried yr amgylchedd, gan sicrhau y caiff cymaint â phosibl o drydan ac incwm ei gynhyrchu
- Parhau i gael tanwydd gan safle cynhyrchu tanwydd Springfields
- Anfon fflasgiau tanwydd i Sellafield yn brydlon ar gyfer ailbrosesu tanwydd arbelydredig
- Cwblhau gweithgareddau cynnal a chadw tra bydd yr orsaf yn gweithredu
- Rheoli gwastraff lefel isel a'i anfon i'r storfa gwastraff lefel isel genedlaethol yng Ngorllewin Cumbria
- Trin a storio gwastraff lefel ganolraddol ar y safle
- Cael gwared â gwastraff nad yw'n beryglus yn unol â'n polisi ‘lleihau, ailddefnyddio, ailgylchu’
- Lleihau peryglon yn gynnar drwy gael gwared ar asbestos, olew gwastraff lefel isel iawn a chyfarpar gweithredol nad yw’n cael ei ddefnyddio
- Gwaith paratoi i sicrhau trosglwyddiad didrafferth i’r cam dadgomisiynu
- Llunio’r Achos Ar Ôl Gorffen Gweithredu a’r Achos Diogelwch wrth Wagio Tanwydd
- Addasu’r cyfarpar trin tanwydd a gwella llwybr y tanwydd er mwyn hwyluso proses gwagio tanwydd sy’n ddiogel, yn gyflym ac yn ddibynadwy
2010-2012 Gwagio Tanwydd
- Tynnu mwy na 49,248 o elfennau tanwydd arbelydredig o’r adweithyddion a’r celloedd storio sych a’u hanfon i Sellafield i gael eu hailbrosesu
- Cynnal a chadw’r cyfarpar a’r systemau i gefnogi’r broses gwagio tanwydd
- Ynysu ac arwahanu cyfarpar a systemau nad ydynt yn cael eu defnyddio, pan fydd hynny’n angenrheidiol
- Adfer, prosesu a phacio gwastraff
2012-2025 Paratoadau Gofal a Chynnal a Chadw
- Tynnu’r holl gyfarpar ac offer sy’n gysylltiedig â’r peiriant tanwydd a chynnal a chadw’r cap peil
- Datgymalu, dadlygru a dymchwel celloedd storio sych 4 a 5
- Selio celloedd storio sych 1, 2 a 3 a’u cadw o fewn y storfa ddiogel. Dadlygru a dymchwel yr holl gyfleusterau gweithredol ac anweithredol, a datgymalu cyfarpar ynddynt
- Datgymalu cyfarpar, cael gwared ar berygl asbestos a dymchwel adeilad y tyrbin
- Dadlygru’r bibell arllwyso elifion ac adeiladu pibell arllwyso newydd
- Tynnu holl gyfarpar ac offer y systemau oeri dŵr
- Dadlygru’r adweithyddion a’r bloc gwasanaethau, datgymalu cyfarpar ynddynt, gostwng eu huchder a’u rhoi mewn cyflwr goddefol a diogel
- Adeiladu cyfleuster rheoli gwastraff lefel isel newydd
- Adeiladu cyfarpar symudol newydd ar gyfer trin elifion
- Sefydlu system drydanol a system Rheolaeth a system Offeryniaeth newydd
2025-2116 Gofal a Chynnal a Chadw
- Monitro cyflwr a diogelwch yr adweithyddion ar y safle wrth i’r ymbelydredd y tu mewn i’r adweithyddion leihau’n naturiol
- Gwaith monitro radiolegol ac amgylcheddol
- Cynnal archwiliadau rheolaidd, gan gynnwys arolygon strwythurol, o amodau’r safle a’r adeiladau, a gwneud gwaith cynnal a chadw pan fydd angen, gan gynnwys gosod gorchudd newydd ar yr adweithyddion
- Rheoli ac adfer y tir
- Rheoli a gwaredu gwastraff lefel isel
- Dadgomisiynu’r orsaf bŵer trydan dŵr gyfagos, Maentwrog – a fwriedir ar gyfer 2086
2116-2125 Clirio’r Safle’n Derfynol
- Gosod cyfleusterau datgymalu adweithyddion
- Datgymalu a dymchwel pob adeilad sydd ar ôl ar y safle, gan gynnwys yr adweithydd a’r bloc gwasanaethau
- Adeiladu, defnyddio, ac yna dymchwel cyfleuster rheoli gwastraff a chyfleusterau datgymalu adweithydd
- Adfer a thirlunio’r tir
- Dad-drwyddedu’r safle a’i wneud yn barod i gael ei ailddefnyddio
